YO TAMIEN FUE TA CLASE CON ANCHEL CONTE.

 

Y... maitin cuan a boira escampe, tornare a canta-le a o silencio atra begada. Agora metiu en a espesura azulenca d´ ista galbana... deixo correr o tiempo, ye denso y pesa, m´esclafa. No reniego ni chilo. Prou de fateras. Cada nuei como ista y como aquela, trovare a calor d´o capezal y o chelo de l´ alma.

Nos ha deixaú o profesor que nos fizo amar as suyas clases porque yeran "unicas", nos feban pensar y nos arrimaban t´a  nuestra realidá y a nuestra cultura. Ta yo o primero que no me fizo "empollar" un libro, me baleba con rechirar os apuntes d ´o qu´eba dicho en clase, y aprender de unas trazas dibertidas.  Me fizo escribir en a pizarra por primera bez en aragonés y bide parolas escritas:  buxo, caixigo, boira, fongo ... yera istorico. Se podeba escribir en aragones... y que fazil...  Se me ridió algo por os castellanismos y por primera bez sintié que as nuestras trazas de charrar no yeran bastas ni fieras, que os bastos y animals yeran os que nos las quereban fer alzar ta siempre.

 Un dia nos dizió que de nosotros pendeba que no se perdese a fabla, y declaro  que ixas parolas encara me rechiran o tozuelo cuasi toz os diyas y muitas nueis. ¡ Cuantas bueltas y rechiras ha dau n´ a  mia mochila- <No deixez morir a mia boz>-! dende 1972.  Semos en o mesmo, encara ye o mio gran  deseyo  que a chobentú no deixe amortar a suya fabla. Que quede bien platero que as parolas son patrimonio bibo y cambeante, pero son a expresion y o mirallo que semos.

Anchel bebirá siempre, mientras bibamos toz os que nos remeramos d´él y le debemos tanto y tanto. Fe- nos pensar, fe- nos bier a nuestra realidá ta seguila u ta cambeala, por o cariño, o rispeto y sus grandismas dotes d ´educador y de líder.  Nos quedan os recuerdos, os libros, chunto a suya chenerosidá y l´exiemplo de filosofia d´a bida.

No reniego ni chilo, prou de fateras...

  

  

AS POZAS DE S. MARTIN

 Feba fresco de maitins, y m´ha paiziu que iba a ser un güen dia. Os gurrións piulando, as falzillas que crian dencima de a mia puerta de casa, y a ulor d´o café recien feito me feban creyer  cuasi cuasi en o reino de os cielos. 

Pero ye 23 de chulio y en Sobrarbe, imos d ´ apercibinos de que semos " carne de folleto " de muitas trazas mal feito, u mal nombrau por chen sin garra de sensibilida.  Ya no se m´ en da cosa, u poco, de  nombres como  Meson del Piojo, (Masada de Morillo Sampietro) cerca de o mal clamau Portillo de as Valles. (Ye o Portillo a secas) o Portillo as Valles ye ta dillá por a Sierra. M´he criaú con ixo, as resiquetas en Boltaña, que agora lo dicen como algo establexiú, cuan toz sabemos que son terminos que s´han puesto ta  redise de os aldeanos, u chen estalentada y desustanciada ta fer gracia, sin ser cosa de risa, cuasi cuasi de plorar.

 Pero o colmo de l´aluzinazión ye, que en a plaza de Torrecilla, cuan yes charrando con una presona de aquí de toda la bida, baixe un turista de un auto eletrico de "alta gama" y te espete: por favor ¿voy bien para el Coño del Mundo?.  

Como ye a tropozienta bez que ixo pasa, y yo no tiengo atras trazas de denuncialo que en iste escrito, pido de rodillas, fincada en tierra y sin resuello,  que o que faya folletos, guias u o que sea, que chire y rechire con a chen que encara sabe como se claman os puestos. Que o nombre que no sepa, que lo pregunte cien bezes, que no ponga cosas inbentadas que puen paicer florituras en os suyos tozuelos, pero a muitos no nos fan ni pizca de gracia. 

 Bier ixos nombres en as mapas me da arcadas pero, abele- ne d´esplicar a un turista que con a millor intinción le paez que ba t´ande diz en o papel que ba, m´esnierba.

Maitin, pongo en a web de Sobrarbe, a os Treserols, Mon Perdiu :o pene de o mundo y ala, a mandar chen t´a punta o pene del mundo. Collonudo.  

" Ni un escrito con nombres falsos, inventaús, malpariús, u sin sustancia",  a toponimia ye cualcosa que muitas bezes esclarece trazas de a nuestra cultura y nos fa prechinar en os debanpasaús y os suyos quefers, antiparti de os desamoraús treballos que fan belúns.  

 

 

O CAMINO A FUENTE N´A TORROZILLA

 No toz os lugárs han una fuente en a plaza. Pero siempre una ye a fuen u fuente d´o lugar. En Torrozilla se troba por un camino t´abaixo, prou penoso, si te beis con un cantaro n´a capeza. Un camin u camino de enrollada, con grans paréz de piedra seca ta os laús, con os suyos aguatillos, regoletas, y pozo ta replegar fiemo de as caballerías, que toz os diyas a puro de biaches con cantaros y argadera, surtiban de l´augua amenister en as casas. 

Carriar augua yera un quefer cuasi siempre de mullérs con cantaros de tiesto y ninóns y ninonas con botejas y cacharros chicotes. En tiempos de trilla u calor abundante, o camino de a fuente podeba ser una procesión.

 En a fuente Torrozilla tamién y eba un labadero escubierto. Se desfizo por orden de no he sabiú ni quiesto saber, qué autoridá. Cuasi dengún s´apercibió dica l´eban espaldaú, fa bien pocos años. Increyible...pero asina. 

Por asti por o 1980, deixó cuasi d´emplegase o camino a fuente. Se podeba ir abrebar bel animal, pero as casas teneban pozos y tamién se carriaba con o trator a puro de bidóns u depositos. Encara se baixaba a labar, pero con l´auto se puyaba a ropa, que antis debeba ser una treballada carriala  farta d´augua n´una canasta. Pos de fer colada, ya ni charramos.

Tamién sacaban augua d´o pozo d´a plaza, que se puede dezir ye a construción más  "retratada" de Torrozilla. Pozo con augua permanente, que a chen d´unas casas d´alredor se puso a  foratiar ta trobala, y la trobón.  Dimpués de barrenar y que a un piquero cuasi le costase a bida. Cuentan, que yera solo abaixo y con a mecha d´o barreno encendida, por más que chilaba no lo sentiba naide. A la fin lo sintió´l cura que pasaba, y  puyó un inte antis de que s´ esclatase. Antiparti de toz os betuperios, surtió augua. Once metros t´abaixo. Muita augua fresca, tan precisa n´o berano que a bel  bezino le costó as botellas de "cava" por rompese o ramal d´a carrucha y perdesen ta siempre.

N´o berano a fuente d´o lugar cuasi se secaba, y os pozos tamién secos, feban surtir una necesidá que cuasi nos fizo fuir t´atro puesto, u por lo menos apercibinos de si se podeba bebir astí. Pero l´augua de a fuente o Petrizo adubió, a la fin d´os ochenta. Astí pasón ta l´istoria quefers como ir a trayer augua, u camíns como o d´a fuente. No charro de a preistoria, ni de cuan os umanos yeran en as espelungas de Guara, charro de fa trenta años, ixos que os bezinos han  treballaú sin resuello, replegando y millorando as faziendas erenzio de cheneracións, ta fer de A Torrozilla un lugar ande pueda bebir chen, antiparti de acullir belúns turistas, güespedes de temporada y atrayer atros bezinos. 

O camino d´ir t´a fuente d´o lugar. Ixa enrollada que s´ha deixaú de pisar. Olbidaú por toz, que cuasi nos fa poner royos de penalidaz qu´imos pasaú.-- A os que se les eba de cayer a cara de bergüenza, no se les ne da cosa.-- Un "monumento popular" con paréz ta os dos laús, a piedra seca, que s´espalda, y se plena de barzas, artos, zerulleros y un yerbuzal qu´espanta.  Ixe piazo de camino d´a fuente que nos queda, imos de  apañalo, tiene que seguir remerando feitos de o lugar, alegrías y penas, pero mas que cosa, ser o libro ubierto ande se lea o grandismo treballo y os escamallos de as chens de iste lugar dende tiempos inmemorials, ta poder bebir astí. Muitas faziendas y dinerals s´ha puesto fer n´atras tierras con l´augua, mientras en istos lugárs o que s´ha penau ta tene- ne, ye increyible. Como ta que agora, por desiria, deixemos espaldar un camino que paez no ye tan "intresán" como atros de Sobrarbe, pero ye o nuestro patrimonio, no aguardar que a belún se le prete fuego un misto n´o tozuelo.