Abside Iglesia Moriello de Sampietro

Abside Iglesia Moriello de Sampietro
Abside Iglesia Morillo de Sampietro

lunes, 12 de noviembre de 2018

QUEREBA SER POETA

Un dia de a Sanmigalada, pleno beranillo de S. Martín, A Torrozilla,  en o conzello de L´Ainsa,
Comarca de Sobrarbe, Uesca, Aragón, Estaú Español.

 M´en boi a replegar l´auto y os güellos se m´en salen de o tozuelo. Ta o laú de arriba, os Treserols, Patrimonio de a umanidá, Nabaín, a Peña Montañesa... y tal otro... una femera con trazas de contenedórs ta replegar basura, que s´en sale por toz os laús .

Ixe ye o panorama. Seguntes chires a capeza ta un laú u ta latro.

Uno que bebiba en Sobrarbe, dizió fa cuasi cinquenta añadas,
que astí u a locura u a poesía, y proú que ye berdá.


Dimpués de bier ixo, emplasto un caixón de tarros de  plastico y atro de tarros de cristal, en o maletero de a mía furgoneta, y baixo ta L´Ainsa, -uno de los pueblos más bonitos de España- me trobo os contenedórs plenos, ta pasar ta uno, tiengo qu´ empuchar l´atro... con augua dencima...  m´en boi. Ta  rematar a la fin, con a furgoneta enfrascada, una pudor atrás que no podeba aguantar, tarros esclafaús y ... proú.

Folletos a capazos nos regalan os güellos y as orellas con as bondáz de una tierra sin parellana en o mundo, cursos ta como reciclar, escritórs, filmadórs, poetas, preocupazión por a despoblazión, toz os diyas salen agudos que han puesto a Sobrarbe en o mapa "mundi".
Pero por muita "poesía" u paisache, u maxia u misterio que nos fayan bier... bi-ha desiria y femeros que fan mal, muito mal. Que amargan a bida, y por lo menos a yo, no me deixan ser poeta, que ye o que he quiesto ser en a bida: cuento que loca ya en soi prou.
Poeta en aragonés, poeta, poeta, en aragonés siempre en aragonés...siempre.

miércoles, 28 de febrero de 2018

NIEBA.


Cuando aquí nieba, ¡que fará en Yeba! y si en Yeba en y a un palmo, qué será en Fanlo...
yera un dicho mui conoxiú, que uey ye en plena autualidá. A nieú ha beniú d´abaixo, y en o cruze de L´Ainsa fa prous años que no s´en eba bisto un palmo...
En as bals cuento se fan resiquetas porque ye una nebadeta que les cai seis u siete bezes cada ibierno.
Pero en o cruze de L´Ainsa... ye atro cantar,  y no dezimos cosa de Balbastro u de Uesca...
Ye que nos imos aconortaú que no caiga cosa. A dar bueltas con l´auto, con os camións, por as bals, por os lugárs, camins y tozals, sin que en caiga una brenca... y dimpués... cuan fa o que eba de fer tol ibierno... todo son problemas. A Naturaleza diz u busatros u yo... se chira asina, y alomillor nos fa prexinar, que o que ha feito lo pue tornar a fer.
Millor no salir de casa, preparar o puchero de garbanzos, os pies en o fogaril... y a leyer... a escribir como yo... u  a bier-la cayer.
O que mas goyo me fa ye ixe silenzio que se fa antis de nebar. No buela ni piula un paixarico, sube una miqueta a temperatura si fa muito frio y ascape ranca a nebar. Uey como yera de nueis me l´he perdiu.
 Ye una murga si tiens que salir con l´auto pero una preziosidá ta caminar por o monte pleno de fantasmas quietos, de rastros de animals, u de cosas que reluzen. Os que bebimos en medio de o monte, lo podemos biyer  muitas bezes, pero agora  mas zerca, en poner o pie n´ a puerta casa.

sábado, 6 de enero de 2018

CHARRAR N´ARAGONES

Soi de ixos zarpaús d´aragoneses que han sentiú charrar en casa n´aragonés, anque a mayestra nos deziba en a escuela contino, que charrabamos mal. Nusatros semos os que emos d´emplegar, espardir, y fer rechirar en o tozuelo de os poders politicos e inteletuals... ta cambear o destino de l´ aragonés.

A nuestra fabla ye en a situación autual, seguntes me paez a yo, porque a soziedá que encara la charraba y conozeba, s´esclató, u la esclatón, y  nos fizon bier a nuestra cultura como una incultura. A chen que se quedó en os lugárs –fabláns de aragonés- antiparti de fe-los sentir fracasaús,  eban muitas  necesidáz  antis qu´ aprender aragonés y al no charrase en a escuela, les paez una  “coseta” de yayos. 
Ixo s´apañaba – me paez a yo –
Dende arriba, como cuasi todo, con milloras ta os que l´ estudien y l´ empleguen . Por exiemplo puntos en as oposicions de mayestros…ezt.
Y nusatros os que encara  la charramos una miqueta; emplegala, charrar, en a nuestra fabla, si sapemos una palabra, ponela, con a capeza alta, sin chustifica-se, de traza natural.
Cuan cuasi toz fayamos ixo, os inteletuals, filólogos y estudiosos de a fabla aragonesa, tendrán que parar de rechirar t´atrás, mirar a realidá y fer una normalización y una amostranza en a escuela, que ya ye prou ora.