Abside Iglesia Moriello de Sampietro

Abside Iglesia Moriello de Sampietro
Abside Iglesia Morillo de Sampietro

sábado, 9 de diciembre de 2023

YO TAMIEN FUE TA CLASE CON ANCHEL CONTE.

 

Y... maitin cuan a boira escampe, tornare a canta-le a o silencio atra begada. Agora metiu en a espesura azulenca d´ ista galbana... deixo correr o tiempo, ye denso y pesa, m´esclafa. No reniego ni chilo. Prou de fateras. Cada nuei como ista y como aquela, trovare a calor d´o capezal y o chelo de l´ alma.


Nos ha deixaú o profesor que nos fizo amar as suyas clases porque yeran "unicas", nos feban pensar y nos arrimaban t´a  nuestra realidá y a nuestra cultura. Ta yo o primero que no me fizo "empollar" un libro, me baleba con rechirar os apuntes d ´o qu´eba dicho en clase, y aprender de unas trazas dibertidas.  Me fizo escribir en a pizarra por primera bez en aragonés y bide parolas escritas:  buxo, caixigo, boira, fongo ... yera istorico. Se podeba escribir en aragones... y que fazil...  Se me ridió algo por os castellanismos y por primera bez sintié que as nuestras trazas de charrar no yeran bastas ni fieras, que os bastos y animals yeran os que nos las quereban fer alzar ta siempre.

 Un dia nos dizió que de nosotros pendeba que no se perdese a fabla, y declaro  que ixas parolas encara me rechiran o tozuelo cuasi toz os diyas y muitas nueis. ¡ Cuantas bueltas y rechiras ha dau n´ a  mia mochila- <No deixez morir a mia boz>-! dende 1972.  Semos en o mesmo, encara ye o mio gran  deseyo  que a chobentú no deixe amortar a suya fabla. Que quede bien platero que as parolas son patrimonio bibo y cambeante, pero son a expresion y o mirallo que semos.

Anchel bebirá siempre, mientras bibamos toz os que nos remeramos d´él y le debemos tanto y tanto. Fe- nos pensar, fe- nos bier a nuestra realidá ta seguila u ta cambeala, por o cariño, o rispeto y sus grandismas dotes d ´educador y de líder.  Nos quedan os recuerdos, os libros, chunto a suya chenerosidá y l´exiemplo de filosofia d´a bida.

No reniego ni chilo, prou de fateras...

  

  

domingo, 23 de julio de 2023

AS POZAS DE S. MARTIN

 Feba fresco de maitins, y m´ha paiziu que iba a ser un güen dia. Os gurrións piulando, as falzillas que crian dencima de a mia puerta de casa, y a ulor d´o café recien feito me feban creyer  cuasi cuasi en o reino de os cielos. 

Pero ye 23 de chulio y en Sobrarbe, imos d ´ apercibinos de que semos " carne de folleto " de muitas trazas mal feito, u mal nombrau por chen sin garra de sensibilida.  Ya no se m´ en da cosa, u poco, de  nombres como  Meson del Piojo, (Masada de Morillo Sampietro) cerca de o mal clamau Portillo de as Valles. (Ye o Portillo a secas) o Portillo as Valles ye ta dillá por a Sierra. M´he criaú con ixo, as resiquetas en Boltaña, que agora lo dicen como algo establexiú, cuan toz sabemos que son terminos que s´han puesto ta  redise de os aldeanos, u chen estalentada y desustanciada ta fer gracia, sin ser cosa de risa, cuasi cuasi de plorar.

 Pero o colmo de l´aluzinazión ye, que en a plaza de Torrecilla, cuan yes charrando con una presona de aquí de toda la bida, baixe un turista de un auto eletrico de "alta gama" y te espete: por favor ¿voy bien para el Coño del Mundo?.  

Como ye a tropozienta bez que ixo pasa, y yo no tiengo atras trazas de denuncialo que en iste escrito, pido de rodillas, fincada en tierra y sin resuello,  que o que faya folletos, guias u o que sea, que chire y rechire con a chen que encara sabe como se claman os puestos. Que o nombre que no sepa, que lo pregunte cien bezes, que no ponga cosas inbentadas que puen paicer florituras en os suyos tozuelos, pero a muitos no nos fan ni pizca de gracia. 

 Bier ixos nombres en as mapas me da arcadas pero, abele- ne d´esplicar a un turista que con a millor intinción le paez que ba t´ande diz en o papel que ba, m´esnierba.

Maitin, pongo en a web de Sobrarbe, a os Treserols, Mon Perdiu :o pene de o mundo y ala, a mandar chen t´a punta o pene del mundo. Collonudo.  

" Ni un escrito con nombres falsos, inventaús, malpariús, u sin sustancia",  a toponimia ye cualcosa que muitas bezes esclarece trazas de a nuestra cultura y nos fa prechinar en os debanpasaús y os suyos quefers, antiparti de os desamoraús treballos que fan belúns.  

 

 

jueves, 25 de mayo de 2023

O CAMINO A FUENTE N´A TORROZILLA


 No toz os lugárs han una fuente en a plaza. Pero siempre una ye a fuen u fuente d´o lugar. En Torrozilla se troba por un camino t´abaixo, prou penoso, si te beis con un cantaro n´a capeza. Un camin u camino de enrollada, con grans paréz de piedra seca ta os laús, con os suyos aguatillos, regoletas, y pozo ta replegar fiemo de as caballerías, que toz os diyas a puro de biaches con cantaros y argadera, surtiban de l´augua amenister en as casas. 

Carriar augua yera un quefer cuasi siempre de mullérs con cantaros de tiesto y ninóns y ninonas con botejas y cacharros chicotes. En tiempos de trilla u calor abundante, o camino de a fuente podeba ser una procesión.
 En a fuente Torrozilla tamién y eba un labadero escubierto. Se desfizo por orden de no he sabiú ni quiesto saber, qué autoridá. Cuasi dengún s´apercibió dica l´eban espaldaú, fa bien pocos años. Increyible...pero asina. 
Por asti por o 1980, deixó cuasi d´emplegase o camino a fuente. Se podeba ir abrebar bel animal, pero as casas teneban pozos y tamién se carriaba con o trator a puro de bidóns u depositos. Encara se baixaba a labar, pero con l´auto se puyaba a ropa, que antis debeba ser una treballada carriala  farta d´augua n´una canasta. Pos de fer colada, ya ni charramos.

Tamién sacaban augua d´o pozo d´a plaza, que se puede dezir ye a construción más  "retratada" de Torrozilla. Pozo con augua permanente, que a chen d´unas casas d´alredor se puso a  foratiar ta trobala, y la trobón.  Dimpués de barrenar y que a un piquero cuasi le costase a bida. Cuentan, que yera solo abaixo y con a mecha d´o barreno encendida, por más que chilaba no lo sentiba naide. A la fin lo sintió´l cura que pasaba, y  puyó un inte antis de que s´ esclatase. Antiparti de toz os betuperios, surtió augua. Once metros t´abaixo. Muita augua fresca, tan precisa n´o berano que a bel  bezino le costó as botellas de "cava" por rompese o ramal d´a carrucha y perdesen ta siempre.

N´o berano a fuente d´o lugar cuasi se secaba, y os pozos tamién secos, feban surtir una necesidá que cuasi nos fizo fuir t´atro puesto, u por lo menos apercibinos de si se podeba bebir astí. Pero l´augua de a fuente o Petrizo adubió, a la fin d´os ochenta. Astí pasón ta l´istoria quefers como ir a trayer augua, u camíns como o d´a fuente. No charro de a preistoria, ni de cuan os umanos yeran en as espelungas de Guara, charro de fa trenta años, ixos que os bezinos han  treballaú sin resuello, replegando y millorando as faziendas erenzio de cheneracións, ta fer de A Torrozilla un lugar ande pueda bebir chen, antiparti de acullir belúns turistas, güespedes de temporada y atrayer atros bezinos. 

O camino d´ir t´a fuente d´o lugar. Ixa enrollada que s´ha deixaú de pisar. Olbidaú por toz, que cuasi nos fa poner royos de penalidaz qu´imos pasaú.-- A os que se les eba de cayer a cara de bergüenza, no se les ne da cosa.-- Un "monumento popular" con paréz ta os dos laús, a piedra seca, que s´espalda, y se plena de barzas, artos, zerulleros y un yerbuzal qu´espanta.  Ixe piazo de camino d´a fuente que nos queda, imos de  apañalo, tiene que seguir remerando feitos de o lugar, alegrías y penas, pero mas que cosa, ser o libro ubierto ande se lea o grandismo treballo y os escamallos de as chens de iste lugar dende tiempos inmemorials, ta poder bebir astí. Muitas faziendas y dinerals s´ha puesto fer n´atras tierras con l´augua, mientras en istos lugárs o que s´ha penau ta tene- ne, ye increyible. Como ta que agora, por desiria, deixemos espaldar un camino que paez no ye tan "intresán" como atros de Sobrarbe, pero ye o nuestro patrimonio, no aguardar que a belún se le prete fuego un misto n´o tozuelo.     

 
 

viernes, 21 de octubre de 2022

"PAIS DESIERTO" TESORO TA SIEMPRE.

 He vivido hostigado mucho tiempo,
 por dolores antiguos,
sin saber
desprenderme de los malos recuerdos
ni abandonar estériles lamentos.
Regresaba sombrio a este lugar,
angustiado,
como a un laberinto,
pero abrí sus ventanas poco apoco
a la luz,
a los grillos,
a la luna. 

Torno ta os poemas de Vicente, con angluzia. Una gambada por o mío lugar me fa tornar ta ixas pachinas, ande trobo as parolas precisas, no cal debana-me os sesos ta trobar ixe punto d´espresión tan zertero y chirmano con o mío sentir.
 Cosirar casas espaldadas, marguins desfeitas, trocos barzaús, y marueños por toz os puestos. Replegar tamién com´ una ringlera de nombres y un esclatíu  d´acordanzas. Nombres  que tiengo en as escrituras cuasi siempre cambeaús, impresonals, se tornan prosimos, familiars, cutianos. Com´una "catarsis" zereña y prezisa ta sustener l´aliento d´un lugar, acordanza de unas bidas que nos han daú a nuestra. 
 Camino con cuatro presonas qu´eban bibiú astí, antes de qu´ ista soziedá que agora esclata por toz os puestos, nos fe- se creyer que nos n´ebanos d´ir, y  a desidia s´adueñase de cuasi tot.
 Rosa, Teresa, Severino, Luis, m´acompañón n´ixa remeranza mezcla de recosiros  y preta realidá.
 Quiero beyer o laú bueno encara; a calle y muitos puestos son escoscaús con o treballo de presonas que biben astí, casa mía no s´ha espaldaú, l´imos feito resistir, y a presencia d´as gallinas por a era y a "delicatessen" de os tomates de Sara y Agustín m´aconortan.
 Remato como  he prenzipiaú con escritos  de Vicente Sánchez, rechirar y rechirar - O país desierto- . No preciso cosa más, n´ista mañana gris pero no triste, apañando l´alacena de os ricuerdos, esbarrar o dramatismo y fe-los míos, a la fin, sin tristura.

Uno ha de hacer la paz con su pasado
si no quiere que mine su presente.
Aceptar lo que no puede cambiar
y aprender a vivir en el momento.
Que el perdón finalice sufrimientos
y pose en nuestros rostros la sonrisa.


 





miércoles, 24 de agosto de 2022

ELECTRONICS BOUTIQUES FESTIVALS- SOBRARBE SECO

 Soy impresionada. Un Electronic Boutique Festival n´o Barranco Cañimás. Cuasi m´afogo con un trozo pan n´o garganchón. M´en boi d´os niervos. Yo ya me tiengo que morir, porque l´esdebinedero d´ista tierra nuestra, lo beigo estalapizaú en pleno.

 Si todo ha de ser montar especta- culos ta trayer chen a "dibertise" por unos dineros ....pos en fin...no tiengo parolas. Por dencima d´a tranquilidá y o buen bebir d´os biellos d´agora... y que majos que semos toz!, y que bien tocan os grupos estrella d´o mundo mundial mientras se ye farto y bien "puesto". A organización ha siú brutal, cuantos treballan ta nusatros.

 O Barrranco Cañimás, ta o que no lo sepa, parellano teneba un camín que baixaba d´a Fuén d´a Sierra ta Boltaña. U sea, baixabamos d´o lugar de Moriello,- Morillo de Sampietro- ta Boltaña. Ixas chens tan desgraziadas, bistas por os güellos de os que bebiban en o "lugar gran" teneban astí masadas en o que se clamaba a Valle, sin cosa más. Un puesto con augua, con casetas,-masadas-pallárs y eras.Un paraiso, ixe si, ande siempre te trobabas chen de pastórs, u a unos carboneros de Navarra que feban carbón de carrasca. Ta o laú Solano, carrascas, y ta o Pocino caixigos. Ixo se remató por a indiferenzia de l´aministrazión como en  tantos puestos, pero agora yo cuento que debeba ser ta os poderes de agora, y ta nusatros, aspirar a otra cosa. No podemos aconortanos a que isto sea un circo, y nusatros os monos. Soi farta. 

Me cago en toz os que fan de comparsas con musica,con treballos, con parolas, con publicacións u con o que sia. Ista falsa "cultureta" de todo o mundo ye güeno y de o bien que bebiban os nuestros yayos, pasiandose por debán nuestro biyéndonos con l´agua n´o cuello ta sacar o nuestro treballo a trancas y barrancas.  Pero me cago cincuenta mil beces, en os fiesteros y fiesteras d´a modernidá, que s´han instalaú en un discurso de que yo soi nieto de tal de casa tal, u fillo de no se quien, soi de tal lugar, u tiengo tal casa. O Sobrarbe ye ta ellos un puesto ande son os reis, con impunidá, puen fer o que les surta de os co...... y encima los conbidamos, les damos os parabiens toz os diyas, de nueis, de 12 a 8 de maitins biben a suya bida, as bacacións, l´esparrame, por d´encima de tot. Qui les vas a charrar de carreras, de centros de Salú u de penalidaz, u de o que nos cuesta bebir astí, si les deixamos fer todo o que en Barcelona, Madrí u ande biban, no les deixan.

A la fin m´en boi, no quiero cambear o tono d´iste blog presonal. Solo puedo decir que cuan bebiba en Moriello me sentiba libre, por dencima de as torpezas de muita, muita chen, que m´ha trataú mal, muy mal.  Uey dimpués de treballar cuarenta años a lomo caliente, en ista ta yo, tierra santa y mártir, no siento cosa mas que impotencia y frustración.  Si  me lo podese premitir no me bieban ni en documental etnografico.


martes, 23 de agosto de 2022

A CHEN SABE O PRECIO DE TODO Y NO SABE A VALOR DE COSA

 Una de as cosas mas fieras de as qu´costumbro a bier, ye que a chen tresbata o valor y o precio.

 Feitos inauditos en a fiesta de Torrozilla, con estalentaús afogando animals, cuando saliban de as fiestas d´o lugár,  dimpués de ponese ziegos de alcol u d´o que fuese. Toz os de casa mia a punto imos estaú de que nos arreasen un estacazo por fe-les bier que o tozuelo no les funciona. 

Pero una imachen ye a que no me deixa dormir: uno de ixos energumenos con un billete de 50 € diziendo que cuanto baleba que lo pagaba anque no eba siu el.

¿ Tande imos con ista chen, con istas fiestas, con ixas aberrazións, chustificando que a chobentú siempre s´ha dibertiu y feito gamberradas?.  Que paren ixe tren, que m´en baixo y camino t´atrás buscando una miqueta de talento.

A yo cuasi me da un mal, y a o mío fillo tamién pero bi-ha chen que encara ha pasaú as millors fiestas d´ a suya bida. 

Me puse a leyer poesía ta no esbarafundiar más. 

A la fin , rechirando n´o mio tozuelo y en a triste realidá, alomillor no ye tan malo aber  d´esbulligar, chilar, rechirar y escotolar todo ixe fiemo.  Encara tiengo que aprender a fer crecer as garras ta sacar o tozuelo t´alto, ta fe-me: más alta, más aguda, más sincera, más amante d´o rispeto, a dominar ixe pronto, a ser  más yo, ubriendo paso a trucazos de pensamiento poetico. 

REALIDÁ, TRISTE REALIDÁ, u " toda la puta vida igual "

 Fa unas semanas pelicula de zine en A Torrozilla n´o programa " zine baixo as estrellas" d´o zertamen enologico d´Espiello y o Concello  de l´Ainsa que diz quiere fer por lo menos un auto cultural en cadag´un d´ os suyos  lugárs,  un munezipio gran, muy gran, con 25 "nucleos" u lugárs, pero con mui poqueta chen. Güen intento, millor ixo, que cosa.

 Menudo apaño tos han feito n´a carretera!!! me diz uno que antiparti n´aber  pasaú en cuasi dos años que lleba apañada, no sabe por o que se bei, que fa por lo menos 8 u diez que podeba estar dic´a l´Ainsa, apañada y polida como una carretera normal. Si no estase por unos bezinos, que no me preguntez porqué, no les paez bien por ande pasa.

 Me fa mal ista tierra mía, pienso que ye a fartera de siempre, aber de luitar por chiquetas cosas que nos fan a bida cuasi imposible. Pos pasa un año y otro y otro y no imos ta debán, ni t´atrás. Bueno, imos t´atrás en poblazión y cuento que ixe ye o pior de toz os mals. Semos " cuatro mixinos" qu´an una encomienda, mantener a tierra zenzera, apañada y pulida con serbizios segúntes a ziudá, ta que biengan cuatro diyas os turistas y os bezinos de temporada, con florituras de revistas qu´han feito, libros qu´ han escrito... a fer fiestas, pasiar con a ronda de Boltaña, afalagar  una miqueta o suyo  ego, y o diya 30 u 31 asti te quedas, bezino d´o  Sobrarbe, t´apañas como puedas, que nusatros ya t´imos animaú y feito treballar unos diyas. Porque nusatros trayemos dineros y balemos muito y as nuestras propiedáz balen cada año más, ista tierra ye com´un florero que saco l´uno de agosto, y lo escondo o 15 u 16 u alargando, alargando, ta dimpués d´as fiestas de Boltaña.  

 Siempre me pregunto cuanto podrá durar ixe  serol, iste dibertimento falso, esta grepa entre a realidá y as güenas parolas, os abrazos, ixe cosirate solo cuan te prezisan, ixa falsedá que a unos alomillor da de chintar,  pero a yo m´esbarafundia. Y por charrar como canta a  Polla Recors : toda la puta vida igual...toda la puta vida igual.    

 

viernes, 1 de julio de 2022

PAIXARICOS

 Os paixaricos son un regalo d´a  naturaleza. Una orquesta de falcillas, gurrións, cardelinas, nos espiertan toz os diyas. Y estiaño una parella de chinchiperas han feito o niedo en una caseteta que les ébanos puesto en  un zerullero d´o chardín. Zinco chinchiperas medran aprisa, aprisa y  plenarán ixe puesto de idas y benidas ta minchar moscas y mosquitos. A ixas, (carbonero común) o mío yayo les deziba o paixarico a primabera, pos comenzipian a cantar muy luego, en febrero u marzo, en o recuesto de bentoleras y bulturnos. Siempre pensaba que no criaban tan zerca de a chen y de os míos mixinos que minchan gurrión cuasi toz os diyas. Una añada mala ta cuasi todas as faziendas, pero güena ta as chinchiperas por o que s´i bei. A punto de salir d´o niedo.


 


sábado, 25 de junio de 2022

Sobre VIA FINIS. Poeta Vicente Sánchez.


 Cuan a bida atocha y atocha de berdá  y a salú se resiente, comenzipio a cargar con un fardo n´o güembro y una losa n´as costillas. Diyas que a tristura aplana os pasos, y soi esmalaganada, paez que no ye o millor inte, ta cullir un libro que m´arrima ta la fin de o caminar, ta la muerte, a de cadagún...Zaguero camín. 
Comenzipio a leyer cuasi con medrana, - soy farta de bebir siempre a un paso de o desastre más gran que se pueda pensar- y maldigo ista clica de boceros que rechiran y rechiran calamidaz tol diya. Farteras d´espitals, de contagios, de guerras, plagas, cambeo climatico, de chela-nos y abrasa-nos, de odios y penurias.
No me paizeba o millor inte ta cosirar o fin de a bida, pero resulta que si, que ye o millor inte que podeba apañar ta leyer Via Finis poesía de Vicente Sánchez, otra bez.  Poemas mui treballaús, direutos, sin falsedaz, que conbidan t´ amar a bida, y deixar aquí as millórs remeranzas y bibenzias compartidas, pos seremos nusatros mientras aiga belún que nos remere. 
Ye baliente y cheneroso, antiparti de bebir, en os escritos deixa trozos d´a  suya esistenzia:  " no habitaré ese tiempo, pero espero vivir en un poema que alguien lea". "Sólo busco preservar cierta vida entre los versos". 
 A reflesión que yo me foi ye paizida a o que leo en iste libro  de l´amigo.  No sé como será ixe fin, si m´adormiré y no m´espertaré más, u si dimpués d´un malentío largo, mui bielleta, m´en iré una tardi. Solo me fa goyo pedir ixa conzenzia, aperzibime de que isto se remata y entremistanto, como diz Vicente, aimar a bida plena, bebir, bebir.  Que no  m´alcanze a bista ta cosa más que zielo y bosque, os Treserols royos, belún quiesto que me de a man... y prou. U alomillor "elegiré mi último minuto para mirar de frente las estrellas."

Si me muero, dejad el balcón abierto, deziba Lorca, yo digo 
agora, deixaz o balcón ubierto siempre, por si me muero.




   





 

jueves, 10 de febrero de 2022

A ROGELIO CALAVIA.

Astí ye a muerte acochada n´una pocha u garchola d´a bida. 
Triste diya o de perder un amigo, triste inte sin consuelo. Tristas parolas as zagueras, que no son traduzión, que sí son rabia, calibo de remeranzas, d' impotenzia, n´ista bida que remata en muerte. 
 
Escribe, Luisa, escribe, tú que sabes, en a biella fabla de os nuestros güelos. Me tiens que traduzir toz os escritos, tiens que fer un metodo, un dizionario, falordias, rilatos, no deixar que se tresbata una fabla.... proposito fantasmal, suenio goyoso, sin rematadura. Treballos y quefers cutianos nos fan redolar como n´o fondo d´una badina. Crepazas, trancas, malentíos... atochan a realidá  ta fenos ansiar surtir d´ixa, ta trobanos atra ñafra. 
 
El derecho a la pereza, La abolición del trabajo, La generación de la utopia, La casa de mi padre... escritos, leturas, encara alredor d´a  mia mesa d´escribir, prenzipios de charradas, rechiras de tozuelo, traduzións, carraña con toz y con tot.

Malas notizias  nos arriman ta ixe fin alomillor no tan lexano, no quiero pensar que isto remata, anque s´acotole ixa enerchía. Son os diyas que a bida se nos amuestra cruda, cuasi irreyal, cuasi de otri, solo l´atitú ha de  fe-nos fuertes. Ixa rasmia ye agora n´ atro puesto, quiero prexinar que n´os Treserols, n´a Peña Montañesa, n´a Espelunga... y en as acordanzas de todas as presonas quiestas.


  


sábado, 1 de enero de 2022

DE PASOS Y DE PAUSAS


Quiero Charrar, agora que tiengo un inte,  d´un atro libro de poemas de Vicente Sánchez: DE PASOS Y DE PAUSAS.

Me caeba n´as mans chust´os primeros diyas de pandemia, lo miré por denzima y lo alzé ta millors tiempos. Antiparti alzaú  n´o tozuelo y n´o peito a rechira de un poema - Junto a tus lágrimas- . Imachen presonal ta yo, como os Treserols u a Peña Montañesa.  No pasa de baldes que nos  dedique un escrito con ixa sensibilidá y agradezimiento a os que han labraú emozións con os suyos escritos. 

“Un circuito se cierra en quien escribe

 si sabe que ha llegado a algún destino

 la pulsión anhelante del mensaje”.

Dos cosas se troban en iste libro que me fan surtir muitos sentimientos: caminar por a naturaleza y prexinar  poesía. Son bersos ta chen que camina, u que ha caminaú y ha feito alomillor en chicotes  trayeutos, grans biaches interiors.

Y bebir os versos n´a naturaleza: N´o brincar de l´augua n´un  barranco, n´a molsa d´un pinar u n´a frescura d´un felqueral, se troban: a fuén con zinco chorros de Lorca, o camín de Machado, a Libertá de Hernández, as nostalchias de Rosalía u as bibenzias de Vicente.  

Remeranzas de cuan a  poesía, os escritos y as rechiras d´o tozuelo me feban compañía en ixos trayeutos de caminante por necesidá, u por goyo. Camins que a la fin se feban curtos y a poesía me paizeba a más gran compaña que podeba tener.

 Un trayeuto ta caminar ande no  bi- ha posibilidaz de trobar coches ni cuasi umanos, ye un regalo ta os sentius, un biache t´ aentro y ta difuera, pleno de os millórs retratos mentals que se pueden fer, chunto as millórs recosiras remeranzas, y … suenios.  

  DE PASOS Y DE PAUSAS.nos Conbida a ixo;  a caminar y a prexinar y sentir l´inte de conesión con a naturaleza como parte d´era que semos: “ siento dentro de mí, caer las hojas”. “Los versos se encaraman a mis labios”.  L´aventura más gran se abre debán de nusatros, de mano de istos poemas, a posibilidá de ser liricos en as trazas de pensar y sentir,  anque no sepamos cosa  de métrica, ixo ye poesía.

 



domingo, 15 de diciembre de 2019

PAIS DESIERTO.

N´o fogaril de casa, a o lau de a flama, os mixinos a-dormius, e ixe fogaril que muitas bezes nos imos calentaú en familia, ubro una bez más, un libro de poemas que fa dias rechiro y rechiro: PAIS DESIERTO. Publicaú por un quiesto amigo: Vicente Sánchez, naxiu en Ojos Negros (Teruel) y que a bibiu entre otros muitos puestos, en Sobrarbe, en casa nuestra, una miqueta de tiempo.
M´embolica un esclatiu en l´esmo, d' esprisions que me son familiars: a infanzia desprotechida, y encara feliz por "unica". A impotenzia debán de os suenios n' un esdebenidero esbalfuriu y cuasi triste. Una tierra que fa de mai, cuan a mai ye frexinando de contino.
 Fablas d' un país desierto, que me paez tan lejos y tan cerca... desierto de chen, pleno de broza, de paixaricos, escorzóns, soles y lunas. Sin minas, pero se me represientan tantos lugárs, por Solana, Bal de Bió, u o mío lugar... tantas patrias del grajo y de la zarzamora... u de as barzas y as ixordigas...
Ese puesto, si sabese, escribir muitos de ixos versos, que foi míos al leye- los y los alzo ta yo, ta siempre. Tal como iba leyendo, paizeba que rechiraba en o mío tozuelo y me resonaba com´un resón ixo que yo eba puesto dezir, y que Vicente nos diz, con sencillez  y perfeuzión, con as parolas chustas ta rechirar as emozións y felas manezer, surtir  ta difuera.  

Desde cualquier lugar, sin volver, vuelvo...

Perfeuto libro ta o qu` aime os trasiegos de  bibenzias y ricuerdos,  trazas de sentimientos a "corazón ubierto".  A yo tamién m´ enristión muitas añadas as ñafras d´a nineza, chunto con una esquizofrenia d` un pasaú en o que se funde unos paisaches y una cultura impresionantes, con a crudeza de tanto fer potriar a os ninóns, as ninonas u zagals y zagalas. Una bida zereña tamién ta la chen gran, pero que se feba inchusticia ta os chicorróns. De tot  ixo bi-ha que surtir liberaus, y en paz, endrezaús ta o que bienga. Y fer de ixo a millor bida qu´ imos puesto tener.

 He vivido hostigado mucho tiempo

Uno ha de hacer la paz con su pasado....
Que el perdón finalice sufrimiento

por dolores antiguos...
y pose en nuestros rostros la sonrisa....

No fa falta dezir más, gracias por ixe berchel zenzero que mos amuestras con chenerosidá. 
Conbido a toz os que leyen iste blog a caminar con corazón por ixe  PAIS DESIERTO de Vicente.

miércoles, 28 de febrero de 2018

NIEBA.


Cuando aquí nieba, ¡que fará en Yeba! y si en Yeba en y a un palmo, qué será en Fanlo...
yera un dicho mui conoxiú, que uey ye en plena autualidá. A nieú ha beniú d´abaixo, y en o cruze de L´Ainsa fa prous años que no s´en eba bisto un palmo...
En as bals cuento se fan resiquetas porque ye una nebadeta que les cai seis u siete bezes cada ibierno.
Pero en o cruze de L´Ainsa... ye atro cantar,  y no dezimos cosa de Balbastro u de Uesca...
Ye que nos imos aconortaú que no caiga cosa. A dar bueltas con l´auto, con os camións, por as bals, por os lugárs, camins y tozals, sin que en caiga una brenca... y dimpués... cuan fa o que eba de fer tol ibierno... todo son problemas. A Naturaleza diz u busatros u yo... se chira asina, y alomillor nos fa prexinar, que o que ha feito lo pue tornar a fer.
Millor no salir de casa, preparar o puchero de garbanzos, os pies en o fogaril... y a leyer... a escribir como yo... u  a bier-la cayer.
O que mas goyo me fa ye ixe silenzio que se fa antis de nebar. No buela ni piula un paixarico, sube una miqueta a temperatura si fa muito frio y ascape ranca a nebar. Uey como yera de nueis me l´he perdiu.
 Ye una murga si tiens que salir con l´auto pero una preziosidá ta caminar por o monte pleno de fantasmas quietos, de rastros de animals, u de cosas que reluzen. Os que bebimos en medio de o monte, lo podemos biyer  muitas bezes, pero agora  mas zerca, en poner o pie n´ a puerta casa.

sábado, 6 de enero de 2018

CHARRAR N´ARAGONES

Soi de ixos zarpaús d´aragoneses que han sentiú charrar en casa n´aragonés, anque a mayestra nos deziba en a escuela contino, que charrabamos mal. Nusatros semos os que emos d´emplegar, espardir, y fer rechirar en o tozuelo de os poders politicos e inteletuals... ta cambear o destino de l´ aragonés.

A nuestra fabla ye en a situación autual, seguntes me paez a yo, porque a soziedá que encara la charraba y conozeba, s´esclató, u la esclatón, y  nos fizon bier a nuestra cultura como una incultura. A chen que se quedó en os lugárs –fabláns de aragonés- antiparti de fe-los sentir fracasaús,  eban muitas  necesidáz  antis qu´ aprender aragonés y al no charrase en a escuela, les paez una  “coseta” de yayos. 
Ixo s´apañaba – me paez a yo – Dende arriba, como cuasi todo, con milloras ta os que l´ estudien y l´ empleguen . Por exiemplo puntos en as oposicions de mayestros…ezt.
Y nusatros os que encara  la charramos una miqueta; emplegala, charrar, en a nuestra fabla, si sapemos una palabra, ponela, con a capeza alta, sin chustifica-se, de traza natural.
Cuan cuasi toz fayamos ixo, os inteletuals, filólogos y estudiosos de a fabla aragonesa, tendrán que parar de rechirar t´atrás, mirar a realidá y fer una normalización y una amostranza en a escuela, que ya ye prou ora.

sábado, 21 de octubre de 2017

Sanmigalada, tristura y ...prou,

  Sanmigalada a la  fin, plebeba, y s´ha feito reyalidá o dicho de yayo:  Siempre plebe a la fin de o sequero. Ixe dicho feba redir a Ibón que se tornaba loco con a falta de augua y tempero ta que treballen as abelletas. Pero ixo de a  sanmigalada ye un tiempo tamién cambeante y estiaño seca mui seca.
 Amás de o cambeo climatico y to ixo, se nos trestabillan as orellas con as noticias de que ban a fer una "macro granja" de tozinos en o termino de Buil. Concello de L´Ainsa, (Biello Sobrarbe). As "nuebas" ta os cuatro gatos que bebimos en o monte, cuasi siempre son tristes. ¡ Como se nos plena a boca con o desarrollo sostenible y a dibersidá ! pero que pronto no gosamos tartir debán de a falta de imaxinazión, d´entusiasmo y de prespetibas d´esdebenidero.
Si, si, ye triste que l´apaño de a carretera duerma en as arcas de no se sape ya, qué Aministración, que no baixe augua por Ena en todo o berano, ni en a fuente de o lugar en salga gota. Tamién  que a  despoblación, baya a fer que en diez años no bi- aiga  que dos u tres treballadórs en muitos lugárs, que se nos eche encima o monte sin saca-le probeito... y trayer  l´augua de a Zinca sea una fantasía esproporzionada por dezir bella cosa.
En o Biello Sobrarbe, cuna de una cultura de fa mil años. Se nos ha remataú l´ imaxinazión y l´entusiasmo que ye o mas intresán, todo o demas se compra y se bende. Y yo me niego a charrar mas  de rentabilidá, de puestos de treballo y de desarrollo.  M´ encarraño sola porque ye como ir ta o cuarto de un moribundo a organizar a fiesta gran. Tanto zinismo me tiene farta.




martes, 25 de julio de 2017

O BERANO RONDADOR

No sapemos como, pero o berano ye astí. Ye tiempo de trilla, de replega, de barafundias, fiestas, maitins con zierzo y tardes de tronada. 
O berano traye chen y cosas nuebas. Estiaño nos  ha traiú os 25 años de a Ronda de Boltaña. Ha siú como una tronada pero de mosica, de chen...de trobadas y de...alegría.
A yo as multitús  m´ acotolan. Y al biyer a Plaza de Boltaña o diya 23 cuasi m´espanto, pero ascape soniaba a son de   "tienes nombre de río, pequeña nazión"... agua del Pirineo que al mar no llegó"...
 O sol en a capeza, as fumeras de os churreros,os empuchóns...
yeran lamins  a o ritmo de O País Perdido, L´albaca u cualsiquiera atra canción,  que fan reposte ta os nuestros tozuelos y se transforman en trazas d´espresions de sentimientos, que han pasau  a ser  coleutibos.
Ta Boltaña he de baixar dende Silbes a estudiar...
Niña bonita levantaté, que raya l´alba por Gallisué...

Y asperando o diya en que al levantar la vista, veremos una tierra que ponga libertad... Muita felicidá ta la Ronda, ta os seguidórs y a os sobrarbenses, que han feito manecer ixa poesía.








martes, 28 de marzo de 2017

A COSIRAR AS ARNAS

En abril, y si saliban rayadas de sol fuerte, entre boiras, as abelletas jambraban. Yeras n´o güerto, charrando con una bezina, u echando una siesta n´una sombra y o rudio de un jambre, te feba alticamar.
Ye como una bola, aentro ba a reina u madre de l´arna,  y una barafundia  de abellas la rodian y buelan a gran belozidá. Si lo beis asina, no se pué parar, o millor apartase y espiar si las beis posase, que si ye una cosa maja de bier, y dimpués se puen replegar ta un arna.
Cuasi siempre sapen t´ande ban, ta otra casa; que si no les ne ponemos, se buscan.
Si son preparadas pa jambrar y pasa o de l´atro dia, que tornamos tal ibierno, diz que ya se paran y no lo fan. Anque o suyo istinto sea jambrar.
As trazas de cuidar as arnas an cambeaú como cuasi toz os quefers. O mio fillo diz que no se puede criar abelletas y dimpués ir a encorrelas cuan s´escapan, que bi-ha teunicas ta cambear ixo, sin estorbalas, y sin que te fayan aborrecer.
 A o mío pai,le paez que si no se replegan jambres, no durarán muito, pero se fia de os conozimientos de a chobentú. Toz os dias, cuan o zagal  marcha ta l´arnal le diz:  ¿bas a cosirar as arnas?.

lunes, 27 de marzo de 2017

MARZO MARZEA

He siú una miqueta atabalada con os quefers y a salú.  Por ixo debe ser que no m´apaño a fer una chiqueta charrada, cuento u falordia , dende fa  muchismo tiempo. Beigo que tornaz a entrar, que toz os diyas entra chen y me fa goyo, por ixo boy a bier si escribo cuasi toz os dias una miqueta.
  Torna la nieú a besitanos fuera d´ora y os zerulleros en flór s´esperrecan con o peso. Una cosa más de a primavera conzietera. O conzieto ye ixe, dimpués de calentar o sol, tornar a chelanos.
Si marzo no marzea, abril acantalea...
Pero marzo marzea, y si no que les ne digan a os que teneban que salir de casa de maitins o sabado y se trobón a nieú como si estasemos en o mas preto de l´ibierno.
de todas trazas, yo quiero desconchelar  as falordias, y tornar a escribir, como siempre, como agora, rechirar en o tozuelo y en a realidá de istas tierras montañesas.
Con ixas imachens cuento, que prou s´y bei.


                                                    

jueves, 14 de julio de 2016

NUNCA ASTÍ, SIEMPRE ASTÍ.

As entradas ta iste blog, s´ han disparaú com´un codete con a fiesta de Moriello. Grazias, porque paez que con ixo s´ha disparaú tamién l´intrés por o lugar, y anque o que s´ha perdiú no y torne, fa goyo saper a cantidá de chen que ha treballaú, treballa, y lo quiere. Pa yo, que ta toz os sitios que iba, me feban dezir tres u cuatro bezes o nombre de ande bebiba, me paez como si de momento s´encendese una luminaria que amuestra o lugar, ya espaldaú y desfeito, pero quiesto, siempre como cualcosa de yo, como un tresoro que pocos conozeban y encara  conocen. 
  No pasaba ni un solo dia, que no me pasase por o tozuelo os treserols royos, as luces d´Aspuña alla baixo... a Peña Montañesa en alto... dimpués de l´escamallo que m´eba de dar ta llegar ta casa, pero una bez allí se yera tan  bien... y con tan poca cosa...
 No me podeba puyar ni baixar toz os libros que precisaba pa ir ta a escuela, y os dicionarios se me clababan en as costillas. Tamién as tronadas me feban tremolar y as cazerías a laú de a pista, as sudadas por querer llegar antes de fese de noche... os chabalíns, que te daban un espanto...y una bez que una alica culebrera se tiró a replega-ne una, en una faixa denzima de a mia capeza, y por un inte m´esbarafundió asabelo.
Pero dimpués  me lo pasaba tan bien astí... feba atra bida, que muitas bezes no podeba compartir con naide, pero era solo de yo y aprendeba tantas cosas...Son tantos ricuerdos...Os cuentos de yayo, as forneadas  de mama,  os cudiaus de tía, o que sabeba yaya... Os crabitos os corderos os pollos y as gallinas (en libertá) y tantas y tantas cosas que anque he bibiú siempre en un lugar chicorrón, no he tornaú a bier...
A ulor de fumo de cortar as arnas, o tremoncillo de a Peña, o güena que sabeba l´augua de a fuente a Morera dimpués de traela por ixos caminos, de os guisos en a caserola de fierro, o pan a torta y o pastillo que saliba en ixe forno, os mios geranios y l´albaca, os mixinos y a perreta.
  Siempre me deziban que yo m´en teneba que ir de allí, que no yera sitio ta bebir y prou que fue berdá; a escuela, l´instituto, o treballo... os amigos... todo yera difuera, solo quedaba astí os sentimientos, os recuerdos y con os quiestos güelos un gran piazo de o mio corazón.   


domingo, 26 de junio de 2016

TA MORILLO, SIN PENAR.

A carretera ta Morillo- Moriello Sampietro cuasi ye rematada. Os treballos ban en bueno, y puyemos en media ora, sin estricallar l´auto y sin escruchinanos as costillas.
En casa nuestra, a puerta yera ubierta, y se sentiba ulor de pan. Os pans y as tortas s´enfriaban en a masadría y o forno echaba calor. Sara con a suya amabilidá nos fizo entrar.  Agustín feba fuego ta asar pizcas y por toz os puestos iba y beniba chen, que quereba acompañanos y zelebrar que ¡a la fin se podeba ir ta Morillo como ta un atro puesto! S´eba de apañar os autos, ta poder recular sin armar un zipizascle, Ibón y Mario s´emplegón en ixo. 
 Encara me paizeba que podeba bier a os zagueros bezinos de o lugar que ya no y son con nusatros:  Pilar y María, y os yayos de casa Campo, O yayo de Martín, Tomás, Ascensión y Bitoria de Casa López, Manuel y Pepe de Casa Berná, Bicente, Feliciana y Abelina de Casa Balantín, Grabiel y Rosa de casa Buerba, y tía Julia de Cuello.
Pero yeran con nusatros Rosa y Teresa de casa López,  Conchita de casa Balantín (que chunto con yo semos as zagueras ninonas d´a  escuela). Luis y Severino con a familia.  Luis, Ascensión y familia tamién de casa López. Ombres y mullés de l´Asociación As Gabarderas, amigos, os cazadórs, os que fan a pista... chen de Boltaña, de Buerba, de Ascaso, de San Vicente...
L´auno me charraba de yayo, l´atro de mama, l´atra de cuan yeranos chicorronas... y todo ixo con pan de casa, cervezas de A cabezonada, cordero de a Fueva, vino y cava de no sé ande, crespillos de Piarruego, licor de Santa Liestra, Trenza de Uesca ... pero a torta y o pan de Morillo, de o forno de Campo se llebón  o premio. Ye a primera bez que beigo sacar pan y pizca y a chen se minchaba o pan antes que a pizca.
Primero rondemos con A Ronda de Boltaña, y luego entre trago y trago, tarugos de queso de craba que fa Manel en La Fresneda en Teruel, porróns de vino y cerbeza y dimpués todo ixo que tos deziba antes.

Os ricuerdos, os abrazos, as risas y as glarimas, os bailes, a chinta, os tragos...os amigos... amainón a tristura de casas y paréz espaldadas, y ruinas sin fin, que no s´han puesto apañar, por as penalidáz qu´eba de pasar o que quereba fer bella cosa.
Entre todo ixo, tornemos ta casa rebentaús, pero con o conbenzimiento de que l´imos daú a buelta a l´istoria de o lugar, y que de o que paizeba la fin, imos feito un comenzipio.          

miércoles, 8 de junio de 2016

APAÑO CARRETERA AINSA-ARCUSA ¡YA YE ORA !

  O domingo, dia 5, torné a salir de casa ta pedir que nos apañen a carretera, no, que apañen a carretera, que no ye nuestra, anque pase por as nuestras propiedáz, ye de toz, una nezesidá ta nusatros, ta poder ir ta casa, ta o medico, t´a  escuela... en fin, que ye familiar como o rollano de casa, pero no ye nuestra, ye publica, de o Concello de L´Ainsa. O nuestro dreito ye poder pasar, y a suya obligazión que se pueda pasar.
 O mío fillo me diz qu´imos espachaú media bida pidiendo pistas, apaños de carreteras, augua, luz, telefono, medicos ... tamién diz, que el no piensa fe-lo asina . Que si apañan as cosas, de buena traza, como en atros puestos, pos que treballará aquí y si no se mirará treballo en atro puesto, y prou. Y atra cosa, que le paez  que no bi-ha dreito ni razóns que asistan a perdida de tiempo en espechicar con cosas tan alazetals. Yo le dizié que ye porque semos probes,  y me rispondió que ye porque semos pocos. De tanto senti-lo dan arcadas, pero ye berdá.
 Si, si, toz queremos que as cosas se fayan bien y no se estricalle cosa. Pero, dimpués de toz os bituperios que imos pasaú y pasamos, ta poder mantener os lugárs, que no nos biengan con capazos de "cinismo".
Porque no trobo atra traza de clamar, os escamallos y l´intrés por parar os treballos en  dos bueltas de carretera, de os que s´han feito casas ande que nunca n´eba abiú, espachan a mierda sin depuradoras, fan manecer placas solárs en os caixigárs,  punchan a traída de l´augua en cualquier puesto, u plantan un montón de zolles  a ran de o río y de a carretera. Si, si, bi-ha muitas cosas que puen ser legals, pero no lo paezen, y no se rechiran, porque as chens de ixos lugárs prexinamos que ye millor tener bezinos que no tene-los. Pero alomillor biyendo as cosas que se beyen, y mascando as cosas que nos fan mascar, nos tornamos "legalistas", aprendemos de leis y de chuezes, emos tiempo ta "controlar" os concellos, y a l´aministrazión
y manezemos , a la fin, amos de a nuestra tierra y de os nuestros quefers.






viernes, 5 de junio de 2015

DE O BURO CON BUEÑA TA OS TRASLARVES Y OS NÚCLEOS DE FECUNDACION


En casa nuestra, siempre eba abiú abelletas. Yera un treballo, que cuasi siempre feba yayo: armar arnas, preparar arnas, limpiar arnas... Aún me paez que lo beigo, dimpués de fer una cesta larga con cañas, asentase en una banqueta en o sol y reboza-la con buro y bueña de baca por aentro. No eba de biese cosa de luz, ni un foraú, dimpués en a punta, un piello (piedra picada redonda) que s'apegaba tamién con bueña y cerraba l'arna por una punta, l'atra que s'eba de cerrar dimpués de entrar as abellas, se le deixaba unos foraús (ludidor) picaús en a piedra redonda. En ixa "fortaleza" bebiban as abellas y feban os panals con a cera y a miel que se les podeba sacar con muito fumo, en a sanmigalada.
Yayo deziba que si podese biyer un arna por aentro, feba u daba, o que fuese. Qu'en Franzia eba conoxiú un ombre, con una de cristal, y ascape l'en eban rebozaú de zera y no se bieba cosa.
Cuan saliba un enxambre, y no se paraba, lo enrestíba-nos, fendo rudio con dos pedretas, u tirando zarpaús de tierra. Dimpués replegalas ta un arna limpia, a paladas con una sartén de o mango curto. Ande se bi-eba un rebullón; astí ba a reina, me deziban. Pero nunca en bide garra, siempre a resguardo de toz os mals...
A chen de o lugar, y de atros puestos, replegaba a miel como una merezina, y la cambeaban por atros presentes: patatas, quesos de güella, dineros, u cosas que se estimaban proú, parellanas con a miel.


Dimpués de tiempo qu'en tenébanos pocas, o mío fillo, ha quiesto treballar con as abellas, ha remataú de estudiar y torna ta casa, no ha puesto bier una cosa que l'aiga enlucernaú más que aprender os aministers  ta criar ixos animals que fan tantismo bien, y que pocas bezes se les reconoce. Diz que ye o treballo mas majo de o mundo. Dificil, pero mui majo.
Uey, l'industria fa unas arnas perfeutas, que fazilitan muchismo os treballos, les posan unos marcos con finismas capas de zera, que ellas continan estirando, perfeutas arquitectas y piqueras, treballan contino, y con o que se sape agora, se les fa fer polidezas. En unas arnas chicorronas, con unos cados largos, pone as larvas y les fa fer reinas, se fabrica os enxambres, y tamién fan miel, y robillo (un regalo, un tesoro)
Ye un treballo minucioso, que precisa conozimiento y entrar una miqueta en os ritmos de a naturaleza.
Tamién emos feito dos arnas de cristal, y no nos las han embadurnaú de propoleos como  deziba yayo.
Paco feba fotos cuan yéranos con os treballos, y bi-ha fotos ta bier y no parar: de os enxambres, de o robillo, de a reina naciendo, de as abelletas danzando, de o moscardo...
Comenzipiamos l'añada criando reinas ta fer enxambres y cambear as reinas biellas en as nuestras arnas. Isto nos fa aber siempre reinas chobens en plena produzión.
As reinas las femos criar, selezionando "larvas" (cucos que se fan de a puesta de a reina) de menos de 8 oras, de as nuestras arnas más güenas, y posandolas n'un arna que no tienga reina. A partir de ixe cuco (larva) as abellas s'en farán atra nueba.
O dia 11 nace a reina, y la posamos n´una caixa chiqueta (núcleo de fecundación) con unas poquetas abellas ta alimentala.
A reina fa unos buelos ta aparease os 10 dias dimpués de nazer.
14 dias dimpués, femos a comprobación de que a reina empieza a poner güegos. Ya se puede poner en os enxambres, ta cambear as biellas, u ta bendela. Ye a cría de reinas.



lunes, 13 de abril de 2015

A PISTA MORIELLO S´APAÑARÁ

Paez que a pista Morillo u Moriello de Sampietro se ba a apañar. O dia 6 fizo pleno o conzello de Boltaña y paez que son d´alcuerdo toz, en que s´apañe. Como he daú tanta tabarra con ixo, pos agora que semos esperanzaús, tamién quiero dezilo. Grazias a toz os que me escribibaz con palabras mui majas, que guardo en o corazón. Gracias a toz os que firmez, y grazias por apoyar os que no tos yera cercano, pero lo beyebaz de chustizia. no cantamos vitoria, pero paez que por lo menos se nos fa caso, que algo ye.
Por otra parte son bibiendo dos presonas en Moriello, de contino. Larga bida y muitas ganas de treballar a Sara y Agustín que replegan o testigo de Raúl y de atros que lo replegón de os mios deban- pasaús. No pararemos dica que Moriello torne a ser o lugar polido, apañaú y espitalario que dantes yera.

YO NO SOI A QUE REPLEGA AS BASURAS

En Sobrarbenses han puesto un enrastre t´a falordia de o duende que replega basuras, y s´ ha leiu de punta a punta. Grazias a toz os que me deziz que bien, que tos cuacan os míos escritos, y que tos rediz una miqueta. Pero tiengo que esclarecer, y que quede bien platero,  que a yo me fa goyo escribir, pero no soi a que pone as basuras en as matas. (Un montón de chen me diz que soi yo). No ninos, un atro duende bi-ha por astí, yo foi treballar o tozuelo, pero no tiengo tiempo ni puedo caminar por ixe trozo de carretera.

viernes, 3 de abril de 2015

O DUENDE QUE REPLEGABA BASURA.

 En un trozo de carretera ta ir de L´Ainsa ta Franzia, pasaú o lugar de Lafortunada u L´infortunada, antes de o desfiladero de as Debotas, comenzipié a biyer un fenomeno que m ´alticamaba. Un día una bolsa de plastico en una buxera, una botella de as d´augua en una aliaga... puestas astí bien bisteras. O primer diya me pensé que yera un siñal de os caminadórs, y no fize caso.
 A l´atro diya en bi- eba mas. Una lata de Coca- Cola, una botella de Fanta en un arto, una botella chicorrona en un romero, una lata de refresco, una bolsa de trunfas, una caixeta de cigarros, sacos de moqueros, tamién una alpargata...
Primero no feba caso, pero me dié cuenta de que o duende de As debotas cuasi cada día en feba una de as suyas, y cuasi toz os romeros, as buxeras os chinibros, o xigüerre, os tremonzillos, yeran plenos de ferrincallos, trafallóns y sacos.
Toz os dias me feba o proposito de pasar sin biyer ixo. Me miraba ta Zinca, sentiba o rudio de l´augua cuasi de mayenco. Me miraba t´o lau d´abaixo de a carretera, ta os árbols de o canto, as flórs, os caixigos y os azirons, as badinas, as ralleras. Si cayeba una miqueta nieú, ixe dia no bi-eba si que a carretera y o chelo, pero si se desfeba, ascape surtiba un saco astí, una botella en a punta un tocho, un papel de chicolate, un ferrincallo n´un lastón...
Les ne deziba a toz, naide me feba caso. No lo bieban. No s´aperzibiban u si lo bieban les paizeba normal.
Mientras yo prexinaba o que podeba ser: ¿espantallos ta os paixaricos?, no, no bi-eba güertos con sembraú en a cuneta.
Un dia me dizié que as yerbas: cantaricas, briolas, chicoinas, lastóns y latazins... fartas de que les tapasen o sol, eban desarrollaú un brazo ta colgar as potras en as matas: buxos, coscollos, espigols, chinibros u sabinas.
Atro dia me paizeba que alomillor yera que una chen no lo bi-eba y atra si, como o cuento de o rei que iba desnudo, pero ixo no podeba ser.  Tamién que como ye a coda de o Glaziar de os Treserols, patrimonio de l´umanidá, eba un dreito ta fer manezer una traza de librase de ixos burzs.
 A reyalidá ye, que astí son as potras en a entrada de o Desfiladero de as Devotas, en a enbista de toz, ta que os que las han tiraú astí u en tiran en atro puesto, se les rechiren os bodillos y paren cuenta.

Ninóns y ninonas, busatros que me podez creyer, no tirez cosa ta suelo ni ta as cunetas en Sobrarbe,  y si uno que ba con busatros en un auto, fa zeño de tirar bella cosa ta suelo, no lo deixéz, o duende de as Debotas, lo pondrá n´a punta un arbol y nos castigará a bielo astí por muito tiempo.




lunes, 9 de marzo de 2015

NO SE CUANDO NOS BEREMOS.

Prou tiempo fa que no podeba escribir, no m´en podeba apañar. Bi ha que tener ganas ta fer charradetas, torna-se a trobar con os escritos, fa diyas que foy a fuineta, no me fa goyo tornar a escribir, rechirar en o tozuelo y troba-me con as chens que ya no y son, que s´en han iu que s´ha remataú o tiempo de ser astí, en a mia bida.
 A mia mama, l´alma de a casa de Morillo, a forniga de ixos móns que agora y son una miqueta mas solos. Tamién pue ser o que siempre m´eba  paiziú a yo, que astí biben en ixa redolada os míos debanpasaús y yo no puedo permitir que no tiengan casa ni güerto, ni figueras ni zerulleros, ni nugueras.
 Esfenderé a casa de o mío pai, deziba Grabiel Aresti. Uey yo tamién lo digo. Cuentra a inchustizia, a desiria, a cruda ley de os dineros y os rendimientos, os mandamases compraús, os "defensórs" de as tradizións...
Con as mans, os brazos, todo o cuerpo y  os mas grans deseyos que pueda guardar en o mío peito, faré o que pueda ta esfender a casa de os míos debanpasaús.
No tiengo que dezi-zos adiós porque sez y serez siempre astí en a yerba, en os arbols u encara en a yedra de as ruinas de tot ixo que tiempo y tiempo l´ez dau bida.
Y a puerta ye ubierta ta o que con yo, por fin bienga a fe-zos compañia.

lunes, 24 de noviembre de 2014

A FUÉN - TE O BIÑERO.

Entre Atorrozilla y Santa Maria de Buil, en un pinar que se clama O Biñero Buil se troba ixa fuén, que toz os años s´ escosca de fuellas y lastóns ta pode-nos fer una fiesta con o buenisma que ye ixa augua.
Seguntes os mas biellos, a millor, en buenos trozos, ta beber. Siempre a misma temperatura, y o mismo gusto, siempre o mismo chorro. ¡Qué buena ye!


imagen no mostrada

viernes, 14 de noviembre de 2014

O CALANDARIO.



O mío yayo, me feba mirar o calandario Mariano Castillo, cuasi toz os diyas, y mas que por o tiempo, por as lunas. - Si podas as parras y no ye mingua, no replegarás ni una uva. Ta dale sal a o ganaú que no sea o dia de a buelta luna, pos as güellas se quedan muertas en as salineras. O tiempo tamién cambea, si cambea a luna. En ixe calandario zaragozano beniba o tiempo qu´eba de fer seguntes as fases, pero antiparti de ixo, que l´azertaba porque poneba l´orache que mas u menos soleba fer, frío en l´ibierno, calor en o berano... a balor yera as lunas.- Ninona, mira en o calandario, qué dia chira a luna, que yo no i-beigo...

O calandario de libré royo: fases de luna, fases de o Sol, santos, refrans y mientras tanto; briendas en a cadiera, a laú de o fogaril, tardes de carne de membrillo y nueces con miel. Pastillos de crabaza de radiqué, nueces tostadas en o forno de pan...matacillas en a mingua, ta que no se rebentasen as morcillas, masadas en creciente, subiba más a masa...
Uey he iú ta una tienda en L´Ainsa, y en o mostrador, bi-eba un calandario royo, calendario zaragozano- y en ixe inte, m´he aperzibiú  una bez más que a yo con a infanzia, se m´en han iú tantas cosas... Yo m´en boi a fer un torta en o forno, y brendar en o fogaril, difuera plebe con fuerza, ye; l´agüerro. 

viernes, 7 de noviembre de 2014

AS LUNAS.

M´en boi ta Obarra a beyer a luz de a luna entrando por una lucana.
Agora, paez que penzipiamos a miranos ta a luna.  Replegamos con una miqueta de admirazión y tamién d´enbidia o que deziban os nuestros saputos güelos. Que ta encubar, cortase o pelo, podar, u rechirar cualsiquiera cosa, s´eba de saber si daba buelta a luna. Podar, en a mingua d´Enero u Chinero, matar o tozino en a mingua, cortase o pelo, si querebas que te crecese, en creciente, y si no, en mingua....
Calandario que me retorna ta l´ infanzia, libro ubierto que nusotros inorantes no imos habiú tiempo de fele caso. Toz os diyas, retorna un "iluminaú" con as lunas, dimpués que as chens de istos lugárs se les a quiesto fer  bier como que ixo no yera berdá, que millor cambear ixo por unos "tratamientos" modernos.
Toz os dichos y diziendas de a luna, no resultan, pero lomenos, bale a pena parase un inte y prexinar, rechirar o tozuelo, probar o que se pueda, y transmitilo.
Por goyo, por rispeto y por apego as benas de a nuestra cultura, boi a parame unos diyas a replegar todo o que pueda de os quefers en os cambeos de luna.

martes, 14 de octubre de 2014

A NEZESIDÁ NO YE CONZIETO

Os dos zagueros diyas paez que s´han disparaú as entradas en istos escritos. No tiengo intinzión de charrar más de a carretera d´Arcusa, si ye ixo o que tos paez que boi a fer. A nezesidá no ye un conzieto, y cuento que o Concello de l´Ainsa, faya o que ha de fer y as cosas s´apañen ta toz. Pero ixo si, antes de que se nos caigan as canas que nos han saliú dende que demandamos ixe mas que preciso amilloramiento de a carretera.
Agora ixo si, ya que pasa por Atorrozilla u Latorrecilla (no por medio, si a 200mts) y boi a poner os campos, os árbols, as piedras y a tierra de ixe lugar,  que cuento se rechirarán y cambearán  ta que toz podamos pasar en l´auto.
 


domingo, 17 de agosto de 2014

SALUDO

Saludos ta la colla de charradórs d'aragonés de Barcelona. M´en trobé una de ixos,  en a fiesta de Buil: Milia Juste de casa Escapa. Me dizió que rechiraban por os míos escritos, me fa goyo de sabelo, y a bier si femos bel entrecambeo de charradas y papels.
A birolla en Buil, güena, güena. M'en fué antes d'ora, que si no no balgo ta cosa,
pero como toz os años a zena mannifica y as charradas tamién, o baile animaú,
anque, a yo, me cuacaban proú os mosicos d'antis.
 A primera bez que yo fué ta Buil, fa cuasi trenta añadas, con a madre de Minerva, Conchi Saludas, o lugar yera prou espoblaú, dimpués de fer a pista, y treballar muito, torna a ser o lugar polido y siñorial que siempre eba siú.
Tamién tiengo un escrito de o berano d'antis, que pondré en o blog cualsiquier dia.
Y a os de a colla de charradórs, cuasi cuasi no quiero deziles atra cosa que como a os nabateros: larga bida, y muitas ganas de treballar.



sábado, 2 de agosto de 2014

L´ESPARBERO QUE NO MINCHABA GALLINAS.




As falordias comenzipian con -  UNA BEZ... y dimpués un cuento, una falordia de yayos ta ninóns u ninonas, de animals que charran y sapen como chens, de chens que se comunican con os animals, u de chen que no ascuita, y que no sape.  
N´o  berano de ista añada, me paez que no m´en queda de falordias n´o tozuelo, y cuasi cuasi se m´entrefila que o bebir cutiano ye prou falordia,  pero m´asentaré n´una tranca de tieda y diré :

 Una bez... n´un lugar de Sobrarbe que ha una peña a lau, eba un esparbero que le feban goyo as gallinas, o gallo, os crabitos y os corderos, que yeran por astí por os praús.
- Yo cazo gallinas, pero tiengo que guardame de que no me cazen a yo.
Por ixo, y antes de que m´estricallen,  faré bondá y no mincharé gallinas, ni os animals que cudian os ombres, antimás no me deixaré bier ta que no sospechen de yo. Por ixo bolaba alto, tan alto, que no se podeba saber si yera paixarico u un  punto n´o zielo.

Se fizo o niedo en o forato, y bebiba bien astí, criaba toz os años, pero no minchaba gallinas, s´en iba a cazar tordas, palomos, fardachos y culebras, ta que os cazadórs no lo matasen. En o lugar bebiba poca chen, yeran cazadórs de  chabalins y atros animals si podeban, pero a ixe esparbero, a ixe, no lo tocaban.  Yera como un pauto; no tocalo, no fa dengún  mal, ye l' esparbero d'a Peña.

  Feba años que no se sentiba muitos rudios en o lugar, que no teneba carretera, se puyaba por una pista de piedras con un todo-terreno. Solo bella bez o  bufido de  l´aire y l´augua de un barranco por dentro de os cantals.  A l´esparbero le feba goyo sentise o chilo que feba cuan otilaba- chiiiiiiiiiii- y puyaba alto, muy alto en o zielo.
Os yayos que bebiban astí deziban: Ixe esparbero no toca cosa, deixalo, deixalo que si no fa mal, bel bien fará.

Pero resulta que un diya manezión unos ombres disfrazaús, eba saliú por a televisión que en un lugar, eba un esparbero que no minchaba gallinas y con antiollos dende a Peña, se lo miraban, yera dino d´estudio, se lo quereban llebar, sacale plumas, replegar güegos... feban fotografias, peliculas, le grababan o chilo...
Ixe diya, l´esparbero s´a perzibió de que no bi- eba atra chen en o lugar, ¿an yeran os amos de as gallinas, que dallaban os praús y sacaban a pagentar güellas?¿an yeran os cazadórs de chabalíns? y ¿as mullérs y os ninóns?  En o lugar no quedaba chen, s´en eban iú ta otro lugar, con carretera, augua corriente, luz eletrica y con quien les aduyase a fer as faziendas. Fartos de que dengún les echase una man. Fartos de que se cayesen os tellaús, s´espaldasen as parez,
se barzasen os trocos y no poder mobese por astí.  
 Agora -bi-eba "presupuesto"ixe monte yera espazio protexiú ta fer criar esparberos, que se sabese o que minchaban y porqué.  




miércoles, 23 de julio de 2014

PREXINANDO EN MORIELLO DE SAMPIETRO.

Aentro de o mio peito, esgarrapo y no trobo trazas  de goyo dengún. Un simple pleno en a Villa de Boltaña, m'ha feito surtir demonios d' aentro, una impotenzia y unos sentimientos que siempre han siu asti, amagaús, fendo un poso, que marca en a bida. No puncha, como dantis, pero alticama y enbesca. Y solo pediba-nos... una miserable pista ta poder lebar materials t' apañar as nuestras propiedaz...
Como deziba Gabriel Aresti : -esfenderé  a casa de o mio pai,  me deixarán sin brazos, sin güembros y sin peitos y con l'alma esfenderé a casa de o mío pai.-
Esfenderé o que aiga que esfender, anque me paez que alomillor ye tarde. Tarde ta os debanpasaús que s´abión de morir sin bier ubrir un grifo en casa. Que bidon cayer as parez qu'eban feito con a sudor de a suya frén, que han bisto cayer a paré tamién de o zeminterio. Tarde ta yo, que dimpués de pasame a bida aprendiendo, apañando casas, limpiando camíns, treballando sin parar, me persigue a desiria. Yo cuento que ye una maldizión de clase: luitar y  luitar siempre por cosas que son augua pasada en atros puestos.
Me solidarizo con os probes de o mundo, con os que no son ascuitaús en as suyas nezesidáz y reibindicazións. Me siento insinificante, numero de papeleta y m´en boi d'astí a esfender a casa de o mío pai.


martes, 18 de marzo de 2014

¿IMOS PERDIÚ L'ESMO?

 Dimpués de leyer escritos publicaús estos dias, charrando de o mal que se fan os treballos en a carretera  de L' Ainsa ta Arcusa, me beniba ta o tozuelo una frase:
En pagas, de toz os betuperios que imos pasau y pasamos, encara pedimos cosas razonables.
No cuento que sea muy difizil de biyer, que queramos llegar ta casa sin estalapizanos, sin espantanos cuan nos tropezamos con un camión, sin rematar en a cuneta, u repasar os debanpasaús de toz os de o Conzello de l´Ainsa.
Cuento que dica  os tresplantaús de ziudá, pueden fer un poder y replegar,  que pedir una chiqueta carretera, no ye ser insensible ta os problemas de o medio ambiente, ni nos queremos cargar un lugar, ni un camino romano, ni una fuen, ni cosa.
No ha de pasar l' AVE ni l' autopista de que me sio, ye una carretera ta ir ta casa nuestra, una miqueta millor que agora, que le repasen os foraús  y que cudien o chelo en l' ibierno. Ixa carretera ( pista esfaltada), que ye agora, tamién se fizo con l' escamallo de os bezinos de ixos lugárs, que encara remeran tener que sacase dineros de chintar, ta fer, por exiemplo, o puente d'Ena.
A chen que imos dezidiu bibir en o monte, en os lugaróns chicotes, no por gusto, emos a casa astí. Y bel dia, se nos fan ganas de no arrastrar tantas dificultaz de contino. Todo ye tan difizil, y ba tan despazio...
Berdá ye, que as güeito de o maitin un dia d'ibierno, no me trobo a dengún de ixos que agora les alticama, por ande pasa a carretera. Son en una "urbanizazión" de L' Ainsa, con a calefazión zentral y biyendo Os Treserols, y a torre de Guaso, por a lucana. 
Que siga bien platero que dengún queremos, por lo menos yo no, que se fayan atropellos ni con os lugárs ni con a chen, ni  con os paixaricos, pero semos fartos de as rechiras y escamallos que fan manezer, chen que cuan ha abiú que rascase as pochas, y reñir ta trayer, por exiemplo l'augua, no sapemos an yeran.
¿No se podrá fer cosa ta apañanos una miqueta a bida a os que bibimos por ixos lugars, u qué?

miércoles, 5 de febrero de 2014

MORIELLO DE SAMPIETRO-Morillo de Sampietro.


N´a  enbista de ista foto me iz a pedir  ir t´astí. Y tos tiengo que dezir que a pista ye intransitable y o lugar mui espaldaú.  Paez cuasi imposible, que no se pueda tener apañaú un lugar tan majo en una situazión  increyible:  A un paso de Buerba y de Boltaña, en a misma puerta de o Parque Nazional, en o "corazón" de o  Sobrarbe y de o Pirineo, por emplegar parolas fazils.
Ta astí imos llegaú y no fan falta parolas, a realidá ye bistera y triste.
Imos a rematar con a desiria de muitos años, imos a  pedir una pista ta Moriello, con proyeutos de recuperazión. Encara bi-ha intresaus en ir ta ixe lugar, a pasar unos dias, u encara a bebir temporadas, queremos tene-lo una miqueta escoscaú, por ixo imos mandau escritos ta o Concello de Boltaña y tamién imos a replegar firmas, a bier si se podese ir ta Moriello como ta cualsiquiera atro lugar. A chen, encara emos de pedir como un "favor" os nuestros dreitos.

POR UN ACCESO DIGNO A MORILLO DE SAMPIETRO, QUE EVITE EL ABANDONO DEFINITIVO DE OTRO PUEBLO DEL PIRINEO ARAGONÉS. 

viernes, 10 de enero de 2014

AS CALANDRAS: PREDIZIÓN DE L'ORACHE TA 2014.

Seguntes a predizión de as pasadas calandras, en 2014  ha de fer iste tiempo u orache:


ENERO: A primera mitá sol y una miqueta de  frío por as nueis, dimpués nuble, pleber, y  temperaturas t'alto ta o tiempo que ye.

FEBRERO: En primeras sol y frio, ta a segunda quinzena, nuble y güena temperatura.

MARZO:  Prenzipia con sol y frio y  a segunda metá nuble, pleber,  y a la fin, aire.

ABRIL: En primeras sol y escampe, ta mediaus nuble,  y a segunda quinzena augua y mas augua.

MAYO:  A predizión ta iste mes, ha siu de pleber mayormente. Unos dias nubles en primeras, y a mitá mes, unos dias de sol.

CHUNIO: En primeras sol y güena temperatura, ta mitá mes s'anubla, y dimpués pleber.

CHULIO: Cuasi todo o mes pleber, calma,  nuble, y a la fin unos diyas de sol.

AGOSTO: Sol, y aire, muito aire, algo nuble a metá mes, y  a la fin atra bez sol.

SETIEMBRE: Sol y fresco, sequera, sol y aire.

OTUBRE:  En primeras, sol y frío, a metá mes, s'anublará, a segunda quinzena pleber, y remata con  sol y aire frío.

NOBIEMBRE:  Nuble y pleber, dimpués  boira. A segunda quinzena nuble, y remata con sereno y güena temperatura.

DICIEMBRE:  A primera quinzena pleber, dimpués unos diyas de sol, ta rematar con bentisca, nebar por os altos, chelo de nueis.

Ta rematar; 2014 puede estar una añada cuasi de o montón, si descontamos o de pleber os meses de chunio y  chulio y o sequero de  setiembre, cuento que son as dos piores notizias, ta os que fan criar en o monte a chinta nuestra de cada diya.
L'augua de chulio, por no poder replegar l' ordio y o trigo, y o sequero en setiembre, por no poder fer a sementera. Por o que se bei, paez que ye cuasi cuasi como l' año pasaú que ha siú apaizido.
 Nos aconortaremos con o que deziban os güelos; as calandras siempre, siempre, no son zerteras.